Uncategorized

የ ግ ን ቦ ት – ማ ስ ታ ወ ሻ !

ጓል ፈዳይን ሻዕቢያ ቫይናክ

ተስፋዬ ገብረኣብ፣ ብዘይካ’ቲ ብመልክዕ መጻሕፍ ዘሕትሞ ዝነበረ ስርሓት፣ ብርክት ዝበሉ እዋናዉያን ሓጸርቲ ጽሑፋት ኣብ ማሕበራዊ ሚድያ ይዝርግሕ ኔሩ እዩ። እዛ እትስዕብ ሓንቲ ካብ’ተን ጽሑፋቱ ኮይና፣ ቅድሚ 14 ዓመት፣ ኣብ ደቡብ ኣፍሪቃ ኮይኑ ዝጸሓፋ እያ።

የ ግ ን ቦ ት – ማ ስ ታ ወ ሻ !(ተስፋዬ ገብረአብ፣ ከፕሪቶሪያ፣ ደቡብ አፍሪካ፣ ቅዳሜ፣ ግንቦት 9፣ 2009፡፡)

ትናንት ደግሞ ግንቦት 8 ነበር፡፡ በአበሻ ዘመን አቆጣጠር ልክ የዛሬ ሃያ አመት ግድም ‹‹ጥቂት ጄኔራሎች›› ኮሎኔል መንግስቱ ላይ የመፈንቅለ መንግስት ሙከራ አድርገው ነበር፡፡ ሳይሳካላቸው በመክሸፉ ዛሬ በህይወት የሉም፡፡ ‹‹እንደ ማንኛውም ተሰባሪ ሰው፣ አጥንት – አስከሬን ሆነዋል፡፡ አምላክ የጄኔራሎቹን ነፍስ ይማር፡፡ እኒያ ሰዎች ከነሙሉ ችግራቸው ከኮሎኔል መንግስቱ የተሻሉ ዜጎች ነበሩ ብዬ አምናለሁ፡፡‹‹ቀደም ሲል ደግሞ (በ1953 ላይ) ጄኔራል መንግስቱ ነዋይ ጃንሆይን ለማስወገድ በመሞከራቸው የዚያ ዘመን ወጣት ትውልድ ጃንሆይን መንካትና መድፈር እንደሚቻል ትምህርት ማግኘት መቻሉ ይታመናል፡፡ ‹‹ሰሞኑን ደግሞ ታሪክ ራሱን ለመድገም ሞከረ፡፡ የመፈንቅለ መንግስት ሙከራ ርእስ አጀንዳ ሆኖ ሲያነጋግረን ሰነበተ፡፡ እኔም ምንም እንኳ የፖለቲካ ተንታኝ ባልሆንም፣ እንደ ጋዜጠኛነቴ በጉዳዩ ዙሪያ አስተያየቴን በጨረፍታ ለማኖር ፈቅጄያለሁ፡፡‹‹የሰሞኑን የመፈንቅለ መንግስት ግርግር ጉዳይ ከማንሳቴ በፊት … በዚህ ወቅት የማንም የፖለቲካ ድርጅት አባል አለመሆኔን ከወዲሁ መግለፅ ግዴታ ሆኖ አጊኝቸዋለሁ፡፡ ቀደም ሲል የወያኔ አባል ለመሆን የበቃሁትም ባልጠበቅሁት ሁኔታ ከተራራ ወደ ሸለቆ እንደ ኳስ እየተጠለዝኩ መሆኑን በ‹‹ጋዜጠኛው ማስታወሻ›› አውግቼያችሁዋለሁና እሱን እዚህ አልደግመውም፡፡ ‹‹ይህን ርእሰ ጉዳይ ማንሳት ያስፈለገበት ምክንያትም በቅርቡ ከግንቦት 7 ጋር በተያያዘ እየታማሁ በመሆኑ ነው፡፡ በመሰረቱ በግንቦት 7 አባልነት መታማት የመያኮራ ነው፡፡ የፖለቲካ ፓርቲዎች ውስጥ የመግባት ሃሳብ ቢኖረኝ ኖሮ ግንቦት 7 ከአማራጮቼ አንዱ በሆነ ነበር፡፡ ‹‹… ከትናንት በስቲያ ግንቦት 7 ነበር እለቱ፡፡ መለስና በረከት የኮሎኔል መንግስቱ ርኩስ መንፈስ ምን ሹክ እንዳላቸው ባይታወቅም፣ እንደ መርዶ ነጋሪ በጠዋት ተነስተው፣ ‹‹ግንቦት 7 ወንበራችንን ሊሰርቅ ሲል ለጥቂት ያዝነው!!›› ሲሉ በጩኸት ነገሩን፡፡ አያያዘናም በረከት፣ ‹‹ለግንቦት 20 ሲያስቡን፣ ግንቦት 7 ላይ አስቀረናቸው›› አለን፡፡ (በርግጥ በረከት እንደዚህ ሲል አልሰማሁትም፣ አይልም ግን አይባልም፡፡)‹‹እንደዋዛ ከጀመርኩት ወግ ወዲያ ማዶ ታዲያ አያሌ መራራ አጀንዳዎች አሉ፡፡ በአስር ሺዎች የሚገመቱ ኢትዮጵያውያን የፖለቲካ እስረኞች በየማጎሪያው የከፋውን ስቃይ እየተቀበሉ ይገኛሉ፡፡ ቴዲ አፍሮ አንዱ ነው፡፡ ብርቱካን ሚደቅሳ – ሁለት፡፡ ገመቹ አባቢያ – ሶስት፡፡ ገመቹን የሚያውቀው አለ? ምናልባት የምናውቀው ጥቂቶች ሳንሆን አንቀርም፡፡ የኦነግ ታጋይ ነበር፡፡ ወያኔ አስሮታል፡፡ ከናይሮቢ አፍነው ወሰዱትና አሁን የት እንዳለ አይታወቅም፡፡ ‹‹የስንቱ ስም ተዘርዝሮ ይቻላል? በርግጥ የሹርሹራ ጓደኛ ስለሆነው ገመቹ በቀጣዩ መፅሃፌ በስፋት አወጋችሁዋለሁ፡፡ ‹‹ሹርሹራ ደግሞ ማነው?›› ትሉ ይሆናል፡፡ ለማንኛውም ሹርሹራ በህይወት የለም፡፡ የወለጋ ምድር ላይ በክብር አርፎአል፡፡ እንግዲህ በየማጎሪያው ከተወረወሩት ወገኖቻችን መካከል እነ ጄኔራል ተፈራ ማሞ የዚህ ማስታወሻ መነሻና ማእከል ናቸውና ወደዚያው ልዝለቅ….* * * *‹‹ወያኔ አብላጫ ቁጥር ባላቸው ብሄሮች መካከል እንዴት አክሮባት እየሰራ መዝለቅ እንዳለበት የቤት ስራውን የሰራው ደርግ ከመውደቁ በፊት እንጂ ትናንት አልነበረም፡፡ ‹‹ቀድሞውንም በተዳከመ የግንኙነት ማእቀፍ ውስጥ የነበረውን የኢትዮጵያ ህዝብ ጣራው ተደርምሶበት፣ የሚያገናኙት የጋራ የስሜት ክሮች እየተበጣጠሱ አንዱ ለሌላው ጠላት በሚሆኑበት ጎዳና ላይ ሲደነቃቀፍ ዘመናት ባጅተዋል፡፡ ‹‹ጄኔራል ከማል ገልቹ ከ150 በላይ የታጠቁ የሰራዊት አባላትን አስከትሎ የኤርትራን ድንበር ሲያቋርጥ ‹‹የወያኔ ሰራዊት ፍፃሜ ተቃረበ!›› ተብሎ ነበር፡፡ የጄኔራሉን መኮብለል ተከትሎ በረከት ስምኦን በሰጠው ቃለምልልስ ‹‹ተገላገልን!›› ሲል ነበር የገለፀው፡፡ ‹‹በዚያው አጋጣሚ ወያኔ ራሱን የሚያጠናክርበት በር ተከፈተለት፡፡ ከ20 ሺህ ያላነሱ ኦሮሞ ወታደሮች ከየጦር ክፍሉ ተመንጥረው ትግራይ ውስጥ ታሰሩ፡፡ በመቶዎች የሚገመቱ ኦሮሞ መኮንኖች ደግሞ ደሴ አካባቢ ወደሚገኝ ወታደራዊ እስር ቤት ተላኩ፡፡‹‹መኮንኖቹን የተረከበቻቸው የእስርቤቱ ሃላፊ፣ ኮሎኔል ብራ የተባለች ነባር የህወሃት አባል ስትሆን፣ የአሉላ ክፍለጦር ኮሚሳር ከነበረችበት ጊዜ አንስቶ በጨካኝነቷ ትታወቃለች፡፡ ‹‹ኮሎኔል ብራ የሃገር መከላከያ ከፍተኛ መኮንኖችን እርቃናቸውን አስቁማ ታስገርፋለች፡፡ እንደ ወይራ በጠነከረ የጎማ ዱላ ተደብድበው፣ ፓራላይዝድ ሆነው ዛሬም ድረስ ማገገሚያ ጣቢያ የተቆለፈባቸው አንድ ሁለት መኮንኖችን አውቃለሁ፡፡‹‹መኮንኖቹ በግርፊያው ወቅት የተጠየቁት አንድ አጭር ጥያቄ ብቻ ነበር፣ ‹‹ከኦሮሞ ጄኔራሎች መካከል ከኦነግ ጋር ግንኙነት ያለው ማነው?››‹‹ድብደባው ሲበዛባቸው የአባዱላን ስም ጠሩ፡፡ ኮሎኔል ብራ ወቀጣው እንዲቆም አዘዘችና ያገኘችውን ‹ምርጥ የምርመራ ውጤት› ለአለቆቿ አቀረበች፡፡ አለቆቿ ግን አባዱላ ዝንተአለም እንደማይከዳ ያውቁ ነበር፡፡ ‹‹ጄኔራል ከማል ሰራዊቱ ውስጥ በህቡእ ካደራጀው የኦነግ ደጋፊዎች መካከል ሲሶውን እንኳ ይዞ አለመውጣቱን ገልፆ ነበር፡፡ ይህ ለወያኔ ‹እልል በቅምጤ› ሆነለት፡፡ በዚያ ሰበብ ምንጠራውን ለማካሄድ በቂ ምክንያት አገኙ፡፡ ‹‹ከጠረጋው በሁዋላ በጎደለ ለመሙላት በተደረገው የስልጣን ሽግሽግ ወያኔ ከአማራ የሰራዊቱ አባላት ድጋፍ ለማግኘት ጥቂት ሞካክሮአል፡፡ በዚያን ጊዜ አፍንጫ ሲመታ አይን ሳያለቅስ ቀረ፡፡ ‹‹ይህን ዘዴ ወያኔ ደጋግሞ ይጠቀምበታል፡፡ ቅንጅት አዲሳባ ላይ በምርጫ ሲያሸንፍ በአንድ አዳር ፊንፊኔ የኦሮሚያ ዋና ከተማ ሆና አደረች፡፡ በዚሁ ሰሞንም ኢህአዴግ አዳማ ከተማ ላይ ባዘጋጀው አንድ ግብዣ ላይ የኢህአዴግ አባላት በትግርኛና በኦሮምኛ ብቻ ጨፈሩ፡፡ ‹‹አባዱላም የሚያምነው ታቦት ስላልነበረው በጠመንጃ ስም እየማለ ታሪካዊ ንግግር አደረገ፡፡ ግብዣው ላይ የነበሩ እንደሚተርኩት አባዱላ እንባው ባይኑ ቸፈፍ ብሎ፣ ‹‹ፊንፊኔ ወደ እናት ክልሏ እንደምትመለስ ህልም ነበረኝ!!›› ሲል እንደ ማርቲን ሉተር ኪንግ ድምፁን ቢለቀው ዝቋላና ካካ ተራሮች ደግሞ ያንን በገደል ማሚቷቸው በኩል አገማሽረው ፈገጉበት፡፡ አባዱላ እንባውና ህልሙን አጣጥሞ ሳያበቃ መለስ ዜናዊ ጠርቶ፣ ‹‹ህልምህን ህፃናት በማይደርሱበት ቦታ አስቀምጠው፡፡ ለጊዜው አዳማ ትቆያላችሁ›› አለው፡፡‹‹ወያኔ ሁለቱ አብላጫ ቁጥር ያላቸውን ብሄሮች በተመሳሳይ ጊዜ አጥቅቷቸው አያውቅም፡፡ አንዱን ሲያጠቃ የሌላው ድጋፍ ስለሚያስፈልገው የፈረቃ ቁማር ይቆምራል፡፡ የህወሃት አባላትም ምንጊዜም ፍርድ ሰጪ ዳኛ ሆነው መካከል ላይ ይገኛሉ፡፡ የኮሜዲያን ክበበው ገዳ ‹ገብረመድህን› የተባለው ገፀባህርይ ለዚህ አባባሌ እንደ መልካም ማሳያ ሊጠቀስ የሚችል ነው፡፡ ‹‹የሰሞኑ፣ ‹የመፈንቅለ መንግስት ድራማ› ለአየር ከበቃ በሁዋላ ዶክተር ብርሃኑ ነጋ በቃለመጠይቁ ሲገልፅ እንደነበረው ከጄኔራል ከማል ኩብለላ በሁዋላ በሰራዊቱ ውስጥ በተካሄደው ጠረጋ የአገዛዙ ስርአት ዘረኛ አካሄድ ላይ ጥያቄ ያሳደሩ የሰራዊቱ አባላት በአብዛኛው እየታፈኑ ተሰውረዋል፡፡ ‹‹ወያኔን እንቅልፍ የሚከለክሉ የሰራዊቱ አባላት አንድ በአንድ እየተመነጠሩ ጥጋቸውን ይዘዋል፡፡ ሃይሌ ጥላሁን ሊጠቀሱ ከሚችሉት መካከል ነው፡፡ በሰሞኑ ‹የመፈንቅለ መንግስት ሙከራ› ጣት ከሾለባቸው መካከልም ሃይሌ ዋናው መሆኑን ውስጥ አዋቂዎች ያወጋሉ፡፡‹‹በኢትዮ-ኤርትራ ጦርነት ወቅት ጄኔራል ሃይሌን የተመለከቱ ጥቂት አስገራሚ ወጎች ነበሩ፡፡ በዚያን ወቅት የህወሃት ጦር ኮማንደሮች በከባድ መሳሪያ ግዢ ሰበብ በሚሊዮናት ዶላር ኮሚሽን እየተቀበሉ የመሆናቸው ወሬ አየሩን በክሎት ነበር፡፡ ጄኔራል ሃይሌ ደግሞ እዚሁ ግዢ አካባቢ የተመደበ ባለስልጣን ነበር፡፡ እና ድምፁን ከፍ አድርጎ በስብሰባ ላይ እንዲህ ሲል ተናገረ፣ ‹‹እኔ እዚህ ተቀምጬ የሃገሪቱን ገንዘብ አትበሉም! ስትዘርፉ እያየሁ ዝም አልላችሁም!››‹‹ጄኔራል ሃይሌ ከነታምራትና በረከት ጋር ኢህዴንን ከመሰረቱት ነባር ታጋዮች አንዱ ሲሆን፣ አዲስአበባ እስክትያዝም በኢህአዴግ ደረጃ ትግሉን የመራ ሰው ነው፡፡ በስብሰባ ላይ የህወሃት ኮማንደሮችን እንዲያ ከተናገረ በሁዋላ ግን የሃይሌ ጉዳይ ያለቀለት ሆነ፡፡ ‹ጡረታ!› አሉና አገለሉት፡፡ ‹‹ጉዳዩ ተራ የእድሜና የአስተዳደር ጉዳይ ቢሆን ኖሮ፣ ሳሞራ የኑስ ቀድሞት ጡረታ ሊወጣ በተገባ ነበር፡፡ እንደሰማሁት ጡረታ ከወጣ በሁዋላም ሃይሌ አላረፈም፡፡ ባገኘው አጋጣሚ ሁሉ፣ ‹እንተዋወቃለን!› እያለ ይናገራል አሉ፡፡ እነ ሳሞራም ‹የትም አይደርስ› በሚል ችላ ብለውት ሰንብተዋል፡፡‹‹… የመፈንቅለ መንግስቱን ወሬ እንደሰማሁ የሚፃፉትን ዜናዎችና ዜና ትንታኔዎች ለማንበብ ሞክሬ ነበር፡፡ ወያኔ ጉዳዩን ከመፈንቅለ መንግስት ወደ ሽብርተኛነት ሊለውጠው ለምን እንደፈለገ ግልፅ ነበር፡፡ ‹‹ ‹ሽብርተኛነት› ክስ ለመመስረት የሚያመች ሲሆን፣ ባንፃሩ ‹መፈንቅለ መንግስት› የሚለው ግንቦት 7 የተባለውን ድርጅት ዝና ይበልጥ ከፍ ሊያደርገው ይችላል የሚል ስጋት አድሮባቸዋል፡፡ ‹‹ ‹ከሰራዊቱ እየተመነጠሩ ያሉት አማራ መኮንኖች የግንቦት 7 አባላት ናቸው ወይስ አይደሉም?› የሚለው ጥያቄም አከራካሪ አይደለም፡፡ ቢሆኑም ብርሃኑና አንዳርጋቸው፣ ‹አባላቶቻችን ናቸው!› ብለው ይነግሩን ዘንድ አንጠብቅም፡፡ ይህ ለታሪክ የሚቆይ ይሆናል፡፡ ‹‹እንደምንሰማው ግን ከግንቦት 7 ጋር ቀጥተኛ ግንኙነት ያልመሰረቱ፣ በአላማው ዙሪያ በራስ አነሳሽነት የተደራጁ ወጣቶች የክፍለ ሃገር ከተሞችን እያጥለቀለቁ ይገኛሉ፡፡ በየአካባቢው ‹ወንድም ጋሻ!› የመሆን የአርበኛነት ስሜት ተቀስቅሷል፡፡ ‹‹… ከመነሻው ብአዴኖች ውስጣቸው ጥሩ አለመሆኑን ገልጫለሁ፡፡ መረጃውም አለኝ፡፡ ከኢህአዴግ አራት አባል ድርጅቶች መካከል ክፉኛ ሞራሉ ተነክቶ በቀውስ ላይ የሚገኘው ብአዴን ነው፡፡ ‹‹ከአባላቶቻቸውና ከህዝቡ የሚመጣውን ግፊት ከቶውኑም ሊቋቋሙት ተቸግረዋል፡፡ ብአዴኖች በህወሃት ላይ የቆየ ቅሬታ እንዳላቸውም ‹የጋዜጠኛው ማስታወሻ› ላይ መግለፄ አይዘነጋም፡፡ ብርሃኑ ነጋ ጠቁሞት እንዳለፈውም ሰራዊቱ ውስጥ ቁጣ አለ፡፡ ‹‹የሰሞነኛው ግርግር ከግንቦት 7 ባሻገር የብአዴን ውስጣዊ ሁኔታ ላይ እንዳተኩር ያደረገኝም ብአዴን የወያኔን ዘረኛ ፖሊሲ እያስፈፀመ መቀጠል ከማይችልበት ደረጃ ላይ መድረሱ ይበልጥ ግልፅ እየሆነ በመምጣቱ ነው፡፡ … ‹‹ለዘመናት ውስጥ ውስጡን ሲብላላ የባጀው የብአዴንና የህወሃት ሽኩቻም ካለፉት ጊዜያት በላቀ ደረጃ ወደ ግጭት አምርቶአል፡፡ ‹ህወሃት ብአዴንን ለማዳከም ይህን ጊዜ ለምን እንደመረጠ መረዳትም ከባድ አይደለም፡፡ ‹‹ምርጫ 2010 እየቀረበ ነው፡፡ የማጭበርበሪያ ሜዳው ከወዲሁ መደልደል እንዳለበት ግልፅ ነው፡፡ ‹ኢትዮጵያዊነት› የሚል ባንዲራ የሚያስቀድሙ ሃይሎችና የትጥቅ ትግል ያወጁ.. አማፅያን ‹የኢትዮጵያ ህዝብ ጠላቶች!› ተብለው ተፈርጀዋል፡፡ … ‹‹ብአዴን ለእነዚህ ሃይሎች የመፈልፈያ ጫካ ሊሆን እንደሚችልም ወያኔ ከምርጫ 97 በቂ ትምህርት አጊኝቶአል፡፡ … የሰሞኑ የመፈንቅለ መንግስት ድራማ እንዲህ ሰፊና አሻግሮ የተመለከተ ስለመሆኑ ምን ጥያቄ አለውና?‹‹የብአዴን አመራር በበረከት (እና ምልምሎቹ) ሰንሰለት ተጠፍሮ የታሰረ ተስፋ የቆረጠ አካል እንደመሆኑ በህወሃት የሚታዘዘውን የጎጥ አስተሳሰብ ተፈፃሚ የማድረግ ብቃቱን አጥቶአል፡፡ ይህ ማለት ግን ህወሃት አልቆለታል ማለት አይደለም፡፡ ‹‹ ‹ኢትዮጵያዊነት› የሚል ባንዲራ ያስቀደሙ ሃይሎች ሲበረቱበት አባዱላ ገመዳን ጠርቶ አንድ የቤት ስራ እንደሚሰጠው ከወዲሁ የሚጠበቅ ነው፡፡ አሁንም አፍንጫ ሲመታ አይን ካላለቀሰ ወያኔ ሊሳካለት ይችላል፡፡ ‹‹ወገኖቼ ሆይ! ምን ቀረ? ቀሪው ግልፅ ነው….፡፡ የኦህዴድና ደህዴን ነገር፡፡ … ኦህዴድን በቀላል ቋንቋ ላስቀምጥላችሁ! አመራሩ ንፁህ ወያኔ ሲሆን፣ አባላቶቹ ደግሞ በአብዛኛው የስራ እድል ለማግኘት ድርጅቱን የተቀላቀሉ በአመለካከት ወደ ኦነግ የሚቀርቡ ናቸው፡፡ ‹‹ ‹ደቡብ ህዝቦች› በሚል ስም አባይ ፀሃዬ ያቋቋመው ድርጅት ‹አለ ይባላል በሳይንስ ግን አልተረጋገጠም› እየተባለ የሚቀለድበት፣ ዶክተር ካሱ ይላላ እንደፈለገ ሲያንገላታው የኖረ ከሞቱት በላይ ያለ እቁብተኛ ነው፡፡ ….‹‹… እነሆ! ዛሬ ቅዳሜ ነው… እለቱም ግንቦት 9፣ 2009፡፡ ፕሪቶሪያ ቁጭ ብዬ እኔም ይቺን እጫጭራለሁ፡፡ የደቡብ አፍሪካ ክረምት ከነጓዙ ገብቶአል፡፡ ዛሬ ጠዋት ከቤት ስወጣ ቆፈኑና ዝናቡ ፕሪቶሪያ ላይ እንደጉድ እየወረደባት ነበር፡፡ ‹‹ያፍሪቃ መሪዎች አብዛኞቹ ፕሪቶሪያ ገብተዋል፡፡ ጃኮብ ዙማ መንበረ ስልጣኑን የሚረከብበት እለት ዛሬ ነው፡፡ የኛው አዛውንት ጋሽ ግርማም ገብተዋል፡፡ ‹‹እንደምንም እየተሹለከለክሁ ወደ ሰኒሳይድ አቅጣጫ ነዳሁ፡፡ አብዛኞቹ አበሾች እዚያ ቀበሌ ይኖራሉ፡፡ ሰኒሳይድ ውብ ናት፡፡ ሰኒፓርክ የተባለ አንድ ትልቅ የገበያ አዳራሽ አለ፡፡ እዚያ ገባሁና በረንዳው ላይ ቁጭ አልኩ፡፡‹‹ሰኒሳይድ በደስታ አብዳለች፡፡ የዙሉ ጎሳ አባላት የቆዳ ልብስ ለብሰው ባህላዊ ጭፈራቸውን ያስነኩታል፡፡ እኔም ደስ አለኝ፡፡ ይህቺን መጣጥፍም መጫጫር ጀመርኩ፡፡ ስጫጭር ቆየሁና ቀና ስል ለካስ አጠገቤ ካለ ጠረጴዛ ላይ አንዲት ነጭ ደቡብ አፍሪካዊት ብቻዋን ቁጭ ብላለች፣ ‹‹ ‹ጋዜጠኛ ነህ እንዴ?› ስትል ጠየቀቺኝ፡፡ ለማሳጠር ያህል፣ ‹ነኝ አዎ!› አልኩ፡፡ ‹በምርጫው ስራ በዝቶባችሁ ከረመ?›፡፡ ‹እኔ እንኳ ደስተኛ አይደለሁም› አልኳት ‹ምንም ስራ የለም፡፡ ምርጫው ቢጭበረበርና ግርግር ቢኖር ስራ ይኖረን ነበር…›፡፡ ቀልዱ ገብቶአት ሳቀች፡፡ እናም፣ ‹እናንተ ስራ ብታጡ ይሻላል› አለች፡፡ ‹‹በርግጥም ደቡብ አፍሪቃውያን ዛሬ ተደስተዋል፡፡ በጣም ተደስተዋል፡፡ ምርጫው በሰላም አለቀ፡፡ አልተጭበረበረም፡፡ እና ፕሪቶሪያ ደስ ብሎአታል፡፡ እንኳን ደስ ያላት፡፡ አዲሳባስ ለዚህ አይነቱ የደስታ እለት የምትበቃው መቼ ይሆን?››

Leave a Reply

Your email address will not be published.